Умытылып баратырған сүннетлер (2-сүннет): Тағамды үш бармақ пенен жеў

Каъб ибн Малик разияллаҳу анҳу айтады: «Расулуллаҳ саллаллаҳу алайҳи ўасаллам тағамды үш бармағы менен жер еди ҳǝм қолын сүртиўден алдын оларды жалар еди» (Имам Муслим, Имам Абу Даўыд, Имам Термизий, Имам Насаий рǝўияты).

Қол менен жейтуғын тағамды үш бармақ: бас, кѳрсеткиш ҳǝм ортанғы бармақлар менен жеў сүннет болады. Буннан мақсет бес бармақты да бирден иске салыў ашкѳзлик болады.

Қараң, бул оғыры аңсат, бирақ саўабы үлкен, гүналарды кеткизиўши, жǝннетке жеткизиўши болған ǝмел. Бирақ ериншеклигимиз, шалағайлығымыз ақыбетинде буған итибар бермеймиз, ǝмел етпеймиз. Кѳпшилигимиз ҳǝтте билмеймиз де. Алдын билмесек, енди билип алдық.

Енди билгенимизге ǝмел етейик ҳǝм басқаларға да жеткизейик. Расулуллаҳ саллаллаҳу алайҳи ўасалламның сүннетлериниң жайылыўына хызмет етиў оған болған муҳаббат ҳǝм сыйласықтың жоқары үлгиси есапланады. Саллаллаҳу алайҳи ўасалламның сүннетлерин анықлық пенен жеткезгенлердиң ҳаққына: «Мениң гǝпимди еситип, ядлап, түсинип, кейининен жеткезген адамды Аллаҳ сыйласын», деп дуўа еткен (Имам Термизий рǝўияты).

Келиң, биз де Расулуллаҳ саллаллаҳу алайҳи асалламның сүннетлерине тағамды үш бармақ пенен жеўге ǝдетленейик.

Аллаҳ таала бǝршемизге ҳǝр бир исте Расулуллаҳ саллаллаҳу алайҳи ўасалламның сүннетлерине ǝмел етиўимизге таўфиқ ада етсин, ǝмин!

Аллаҳумма салли ўа саллим ъала Муҳаммадин ўа ъала али Муҳаммад

Давран НУРМУҲАММАД.

Muslim.uz сайтынан Беруний районы «Дǝрўиш ийшан» жоме мешити имам-хатиби Рахат Мадраимов таярлады.

  • 84 мәрте оқылды

Paziylet.uzҚарақалпақстан мусылманлары қазыяты веб-сайты