Умытылып баратырған сүннетлер (4-сүннет): Тǝўбе намазы

Ҳǝзирет Абу Бакр Сиддиқ разияллаҳу анҳудан рǝўият етиледи. Расулуллаҳ саллаллаҳу алайҳи ўасаллам: «Гүна еткен адам шырайлы (сүннет ҳǝм ǝдепке ǝмел еткен ҳалда) тахарат алып, еки ракат намаз оқыса ҳǝм Аллаҳ тааладан гүнасының кешириўин сораса, Аллаҳ таала оны мағпират етеди», деди (Имам Ибн Можа рǝўияты).

Абу Даўыдтың рǝўиятында: «Аллаҳ таала оны ǝлбетте мағпират етеди», делинген.

Қараң, бул оғыры аңсат, бирақ саўабы үлкен, гүналарды кеткизиўши, жǝннетке жеткизиўши болған ǝмел. Бирақ ериншеклигимиз, шалағайлығымыз ақыбетинде буған итибар бермеймиз, ǝмел етпеймиз. Кѳпшилигимиз ҳǝтте билмеймиз де. Алдын билмесек, енди билип алдық.

Расулуллаҳ саллаллаҳу алайҳи ўасалламның сүннетлериниң жайылыўына хызмет етиў оған болған муҳаббат ҳǝм сыйласықтың жоқары үлгиси есапланады. Саллаллаҳу алайҳи ўасалламның сүннетлерин анықлық пенен жеткезгенлердиң ҳаққына: «Мениң гǝпимди еситип, ядлап, түсинип, кейининен жеткезген адамды Аллаҳ сыйласын», деп дуўа еткен (Имам Термизий рǝўияты).

Келиң, биз де еткен гүналарымыз кеширилиўин Аллаҳ тааладан сорап, тǝўбе намазын оқыўға ǝдетленейик.

Аллаҳ таала бǝршемизге ҳǝр бир исте Расулуллаҳ саллаллаҳу алайҳи ўасалламның сүннетлерине ǝмел етиўимизге таўфиқ ада етсин, ǝмин!

Аллаҳумма салли ўа саллим ъала Муҳаммадин ўа ъала али Муҳаммад

Давран НУРМУҲАММАД.

Muslim.uz сайтынан Беруний районы «Дǝрўиш ийшан» жоме мешити имам-хатиби Рахат Мадраимов таярлады.

  • 176 мәрте оқылды

Paziylet.uzҚарақалпақстан мусылманлары қазыяты веб-сайты