Муфтий ҳǝзиретлериниң Сурхандǝрья ўǝлаятына сапары басланды

25-ноябрь күни Ѳзбекстан мусылманлары басқармасы баслығы, муфтий Усмонхон Алимов ҳǝзиретлери, Дин ислери бойынша комитет баслығы Абдуғофур Аҳмедов ҳǝм «Вақф» қайырқомлық жǝмийетлик фонды баслығы Яҳё Абдураҳмонов Сурхандǝрья ўǝлаятында диний-билимлендириў тараўында алып барылып атырған жумыслар менен жақыннан танысыў, имам-хатиблер ҳǝм халық ўǝкиллери менен ушырасыў мақсетинде усы ўǝлаятқа сапары басланды.

Сурхандǝрьяның жүреги болған гѳне Термиз ѳзиниң бай тарийхы, дүньяға белгили алым-уламалары менен тарийх бетлерине, ǝллеқашан, алтын ҳǝриплер менен жазылған дүрдана қалалар тайпасына киреди.

Соңғы жылларда ҳүрметли Президентимиз басламасы менен бул жерде қоным тапқан бир қатар уламалардың зыярат орынлары, мазарлары абаданластырылып, зыяратгаҳқа айландырылды.

Муфтий Усмонхон Алимов ҳǝзиретлери ўǝлаятқа ѳз сапарын уллы бабамыз Ҳǝким Термизий қǝбирин зыярат етиў менен баслады. Уллы уламалар руҳын шад етиў мақсетинде, Қураны кǝрийм аятлары тилǝўат етилип, журт абатлығы ҳǝм халқымыз пǝраўанлығын тилеп дуўалар етилди.

Уллы ойшыл зыяратгаҳы ўǝлаяттағы ең абат, ең кѳркем мǝканлардан бирине айланғаны мǝлим. Бул дǝргайға зыяратқа келиўши жергиликли ҳǝм шет ел саяхатшылар саны да жылдан-жылға кѳбеймекте.

Ҳүрметли Президентимиздиң усыныслары тийкарында бул зыярат орнында кең кѳлемли қурылыс ислери ǝмелге асырылды. Мазардың ишки бѳлеги толық реконструкция етилип, нағыслар менен безеў берилген, Қураны кǝрийм аятлары жазылған. Нǝтийжеде, уллы бабамыз мǝңги қоным тапқан теберик мǝкан текғана жерлеслеримиз, бǝлки шет елли саяхатшылардың да ардақлы мǝканына айланды.

Сурхандǝрья ўǝлаяты сапары даўам етпекте.

Ѳзбекстан мусылманлары басқармасы Баспасѳз хызмети

  • 79 мәрте оқылды

Paziylet.uzҚарақалпақстан мусылманлары қазыяты веб-сайты